{ بِسْمِ اللّٰهِ:اللہ کے نام سے شروع ۔} علامہ احمد صاوی رَحْمَۃُاللہ تَعَالٰی عَلَیْہِ فرماتے ہیں:قرآن مجید کی ابتداء’’ بِسْمِ اللّٰهِ‘‘سے اس لئے کی گئی تاکہ اللہ تعالٰی کے بندے اس کی پیروی کرتے ہوئے ہر اچھے کام کی ابتداء ’’بِسْمِ اللّٰهِ‘‘ سے کریں۔(صاوی،الفاتحۃ، ۱ / ۱۵) اور حدیث پاک میں بھی(اچھے اور)اہم کام کی ابتداء ’’بِسْمِ اللّٰهِ‘‘ سے کرنے کی ترغیب دی گئی ہے،چنانچہ

حضرت ابو ہریرہ رَضِیَ اللہ تَعَالٰی عَنْہُ سے روایت ہے،حضورپر نورصَلَّی اللہ تَعَالٰی عَلَیْہِ وَاٰلِہ وَسَلَّمَنے ارشاد فرمایا: ’’جس اہم کام کی ابتداء ’’بِسْمِ اللّٰهِ الرَّحْمٰنِ الرَّحِیْمِ‘‘ سے نہ کی گئی تو وہ ادھورا رہ جاتا ہے۔ (کنز العمال، کتاب الاذ کار، الباب السابع فی تلاوۃ القراٰن وفضائلہ، الفصل الثانی۔۔۔الخ، ۱ / ۲۷۷، الجزءالاول،الحدیث:۲۴۸۸)

 لہٰذا تمام مسلمانوں کو چاہئے کہ وہ ہرنیک اور جائز کام کی ابتداء ’’بِسْمِ اللّٰهِ الرَّحْمٰنِ الرَّحِیْمِ‘‘ سے کریں ،اس کی بہت برکت ہے۔^([1])

{اَلرَّحْمٰنِ الرَّحِیْمِ:جو بہت مہربان رحمت والاہے ۔}امام فخر الدین رازی رَحْمَۃُاللہِ تَعَالٰی عَلَیْہِفرماتے ہیں : اللہ تعالٰی نے اپنی ذات کو رحمٰن اور رحیم فرمایا تو یہ اس کی شان سے بعید ہے کہ وہ رحم نہ فرمائے ۔مروی ہے کہ ایک سائل نے بلند دروازے کے پاس کھڑے ہو کر کچھ مانگا تو اسے تھوڑا سا دے دیا گیا،دوسرے دن وہ ایک کلہاڑا لے کر آ یا اور دروازے کو توڑنا شروع کر دیا۔اس سے کہا گیا کہ تو ایسا کیوں کر رہا ہے؟اس نے جواب دیا:تو دروازے کو اپنی عطا کے لائق کر یا اپنی عطا کو دروازے کے لائق بنا۔اے ہمارے اللہ! عَزَّوَجَلَّ،رحمت کے سمندروں کو تیری رحمت سے وہ نسبت ہے جو ایک چھوٹے سے ذرے کو تیرے عرش سے نسبت ہے اور تو نے اپنی کتاب کی ابتداء میں اپنے بندوں پر اپنی رحمت کی صفت بیان کی اس لئے ہمیں اپنی رحمت اور فضل سے محروم نہ رکھنا۔(تفسیرکبیر، الباب الحادی عشرفی بعض النکت المستخرجۃ۔۔۔الخ، ۱ / ۱۵۳)

 ’’بِسْمِ اللّٰهِ‘‘سے متعلق چند شرعی مسائل:

          علماء کرام نے ’’ بِسْمِ اللّٰهِ‘‘ سے متعلق بہت سے شرعی مسائل بیان کئے ہیں ، ان میں سے چند درج ذیل ہیں :

 (1)… جو ’’ بِسْمِ اللّٰهِ‘‘ہر سورت کے شروع میں لکھی ہوئی ہے، یہ پوری آیت ہے اور جو’’سورۂ نمل‘‘ کی آیت نمبر 30 میں ہے وہ اُس آیت کا ایک حصہ ہے۔

(2)… ’’بِسْمِ اللّٰهِ‘‘ ہر سورت کے شروع کی آیت نہیں ہے بلکہ پورے قرآن کی ایک آیت ہے جسے ہر سورت کے شروع میں لکھ دیا گیا تا کہ دو سورتوں کے درمیان فاصلہ ہو جائے ،اسی لئے سورت کے اوپر امتیازی شان میں ’’بِسْمِ اللّٰهِ‘‘ لکھی جاتی ہے آیات کی طرح ملا کر نہیں لکھتے اور امام جہری نمازوں میں ’’بِسْمِ اللّٰهِ‘‘ آواز سے نہیں پڑھتا، نیز حضرت جبریل عَلَیْہِ السَّلَامجو پہلی وحی لائے اس میں ’’ بِسْمِ اللّٰهِ‘‘ نہ تھی۔

(3)…تراویح پڑھانے والے کو چاہیے کہ وہ کسی ایک سورت کے شروع میں ’’بِسْمِ اللّٰهِ‘‘ آواز سے پڑھے تاکہ ایک آیت رہ نہ جائے۔

(4)… تلاوت شروع کرنے سے پہلے ’’اَعُوْذُ بِاللہ مِنَ الشَّیْطٰنِ الرَّجِیْمِ‘‘ پڑھنا سنت ہے،لیکن اگر شاگرد استادسے قرآن مجید پڑھ رہا ہو تو اس کے لیے سنت نہیں۔

(5)…سورت کی ابتداء میں ’’ بِسْمِ اللّٰهِ‘‘ پڑھنا سنت ہے ورنہ مستحب ہے۔

(6)…اگر ’’سورۂ توبہ‘‘ سے تلاوت شروع کی جائے تو’’اَعُوْذُ بِاللہِ‘‘ اور’’بِسْمِ اللّٰهِ‘‘دونوں کو پڑھا جائے اور اگر تلاوت کے دوران سورۂ توبہ آجائے تو ’’بِسْمِ اللّٰهِ‘‘پڑھنے کی حاجت نہیں۔[1] ۔۔۔ بِسْمِ اللّٰهشریف کے مزید فضائل جاننے کے لئے امیرِ اہلِسنّت حضرت علّامہ مولانا محمدالیاس عطار قادری، رضویدَامَتْ بَرَکاتُہُمُ الْعَالِیَہ کی تالیف،فیضانِبِسْمِ اللّٰهِ(مطبوعہ مکتبۃ المدینہ)،، کا مطالعہ فرمائیں۔

{قُلْ اَعُوْذُ بِرَبِّ النَّاسِ: تم کہو: میں  تمام لوگوں  کے رب کی پناہ لیتا ہوں  ۔} اللّٰہ تعالیٰ ساری مخلو ق کا رب ہے مگر چونکہ انسان اشرفُ المخلوقات ہے، اس لئے ان کا خصوصیت سے ذکر فرمایا۔( خازن، النّاس، تحت الآیۃ: ۱، ۴ / ۴۳۰)

انسان کی عظمت و شرافت:

            اس سے انسان کی عظمت و شرافت بھی معلوم ہوئی کہ بطورِ خاص اللّٰہ تعالیٰ نے اپنی رَبُوبِیَّت کی نسبت اُس کی طرف فرمائی۔ علماء نے یہاں  یہ نکتہ بیان فرمایا ہے کہ اس سورت میں  پانچ مرتبہ     لفظ ’’اَلنَّاسِ ‘‘ آیا ہے اس میں  حکمت یہ ہے کہ چونکہ انسان بچپن میں  صرف پرورش ہی پاتا ہے، اس لئے سب سے پہلے ’’رَبِّ النَّاسِ‘‘ یعنی رَبُوبِیَّت والی صفت کا ذکر فرمایا۔جبکہ انسان جوانی میں  مست ہو کر بے راہ ہو جاتا ہے، اس وقت اس پر قانونی گرفت کی ضرورت ہے، اس لئے یہاں ’’مَلِكِ النَّاسِ‘‘ یعنی لوگوں  کا بادشاہ فرمایا، اورچونکہ انسان بڑھاپے میں  عبادت میں  مشغول ہوتا ہے، اس لئے تیسری جگہ اللّٰہ تعالیٰ کی صفت ِ اُلُوہِیَّت اور معبودیَّت کا ذکر فرمایا یعنی ’’اِلٰهِ النَّاسِ‘‘۔ چوتھی جگہالنَّاسِ سے صالحین مراد ہوسکتے ہیں کہ شیطان عموماًانہیں  ہی وسوسوں  کے ذریعے عبادت سے ہٹانے کی کوشش کرتا ہے اور پانچویں  جگہ النَّاسِ سے مراد شر پسند اور فسادی لوگ ہو سکتے ہیں  کہ وہاں  لوگوں  کے شر سے پناہ مانگی گئی ہے۔

{مَلِكِ النَّاسِ: تمام لوگوں  کا بادشاہ ۔} یعنی ان کے کاموں  کی تدبیر فرمانے والاہے اورسب کا حقیقی حاکم و مالک کہ دنیا میں  بھی کسی کو حکومت و مِلکیَّت ملے تو اسی کی عطا سے ملتی ہے۔

{اِلٰهِ النَّاسِ: تمام لوگوں  کا معبود۔}  معبود ہونا اسی کے ساتھ خاص ہے اور سارے لوگوں  کا حقیقی معبود وہی ہے۔

{مِنْ شَرِّ الْوَسْوَاسِ ﳔ الْخَنَّاسِ: باربار وسوسے ڈالنے والے، چھپ جانے والے کے شر سے۔} اس سے مراد شیطان ہے اوریہ اس کی عادت ہے کہ انسان جب غافل ہوتا ہے تو اس کے دِل میں  وسوسے ڈالتا ہے اورجب انسان اللّٰہ تعالیٰ کا ذکر کرتا ہے تو شیطان دبک رہتا ہے اور ہٹ جاتاہے ۔

وسوسہ اور اِلہام میں  فرق:

             یاد رہے کہ برے خیال کو وسوسہ کہا جاتا ہے جبکہ اچھے خیالات کو اِلہام ۔ وسوسہ شیطان کی طرف سے ہے لہٰذا اس پر لَا حَوْل پڑھنی چاہیے،اور اِلہام فرشتے کے ذریعے اللّٰہ تعالیٰ کی طرف سے ہوتاہے، اس لئے اس پر اللّٰہ تعالیٰ کا شکر کرنا چاہیے۔ نفسِ اَمّارہ کے غلبہ میں  وسوسے زیادہ ہوتے ہیں جبکہ نفسِ مُطْمَئِنّہ کے غلبہ میں  اِلہام زیادہ۔ شیطان ہمارا ایسا دشمن ہے جو ہمیں  نظر نہیں  آتا یعنی وہ ہمیں  دیکھتا ہے اورہم اسے نہیں  دیکھتے، لہٰذا اس طاقت والے رب عَزَّوَجَلَّ کی پناہ مانگو، جو اسے دیکھتا ہے، اور وہ رب عَزَّوَجَلَّ کو نہیں  دیکھتا ۔قوی دشمن سے قوی رب عَزَّوَجَلَّ کی پناہ مانگو۔

{اَلَّذِیْ یُوَسْوِسُ فِیْ صُدُوْرِ النَّاسِ: وہ جو لوگوں  کے دلوں  میں  وسوسے ڈالتا ہے۔} یعنی شیطان زبان و آواز سے نہیں  بہکاتا، بلکہ براہ راست دل میں  اثر ڈالتا ہے، بری چیز کو اچھی کر دکھاتا ہے۔خود دشمن ہے مگر دوستی کے لباس میں  آتا ہے،پھر جیسا انسان ہوویسا ہی اسے وسوسہ ڈالتا ہے۔

{مِنَ الْجِنَّةِ وَ النَّاسِ: جنوں  اورانسانوں  میں  سے۔} یہ بیان ہے وسوسے ڈالنے والے شیطان کا کہ وہ جنوں  میں  سے بھی ہوتا ہے اور انسانوں  میں  سے بھی جیسے شَیاطینِ جن انسانوں  کو وسوسے میں  ڈالتے ہیں  ایسے ہی شیاطینِ انسان بھی ناصح بن کر آدمی کے دل میں  وسوسے ڈالتے ہیں  پھر اگر آدمی ان وسوسوں  کو مانتا ہے تو اس کا سلسلہ بڑھ جاتا ہے اوروہ خوب گمراہ کرتے ہیں  اوراگر اس سے متنفر ہوتا ہے تو ہٹ جاتے ہیں  اور دبک رہتے ہیں ۔

جنوں  اور انسانوں  کے شَیاطین سے پناہ مانگیں :

            آدمی کو چاہئے کہ جنوں  کے شَیاطین کے شر سے بھی پناہ مانگے اورانسانوں  کے شیاطین کے شر سے بھی۔ اس سلسلے میں  یہاں  ایک مفید وظیفہ پیش ِخدمت ہے ،چنانچہ حضرت عائشہ صدیقہ رَضِیَ اللّٰہُ تَعَالٰی  عَنْہَا  فرماتی ہیں  کہ رسول اللّٰہ صَلَّی  اللّٰہُ تَعَالٰی عَلَیْہِ وَاٰلِہ وَ سَلَّمَ رات کے وقت جب بستر مبارک پر تشریف لاتے تو اپنے دونوں  دست ِمبارک جمع فرما کر ان میں  دم کرتے اور سورہقُلْ هُوَ اللّٰهُ اَحَدٌ اور قُلْ اَعُوْذُ بِرَبِّ الْفَلَقِاور قُلْ اَعُوْذُ بِرَبِّ النَّاسِپڑھ کر اپنے مبارک ہاتھوں  کو سر مبارک سے لے کر تمام جسم ِاَقدس پر پھیرتے جہاں  تک دست ِمبارک پہنچ سکتے، یہ عمل تین مرتبہ فرماتے۔( بخاری، کتاب فضائل القرآن، باب فضل المعوّذات، ۳ / ۴۰۷، الحدیث: ۵۰۱۷)

            حضرت عبد اللّٰہ بن خبیب رَضِیَ اللّٰہُ تَعَالٰی عَنْہُ فرماتے ہیں  :ہم پر ہلکی بارش ہوئی اور اس وقت اندھیرا چھایا ہوا تھا اور ہم نبی کریم صَلَّی اللّٰہُ تَعَالٰی عَلَیْہِ وَاٰلِہ وَ سَلَّمَ کا انتظار کر رہے تھے تاکہ وہ آ کر ہمیں  نماز پڑھائیں ،پھر حضور پُر نور صَلَّی  اللّٰہُ تَعَالٰی عَلَیْہِ وَاٰلِہ وَ سَلَّمَ ہمیں  نماز پڑھانے کے لئے تشریف لائے اور ارشاد فرمایا’’پڑھو!میں  نے عرض کی :ـکیا پڑھوں ؟ ارشاد فرمایا:’’صبح شام تین تین بار قُلْ هُوَ اللّٰهُ اَحَدٌاور قُلْ اَعُوْذُ بِرَبِّ الْفَلَقِاور قُلْ اَعُوْذُ بِرَبِّ النَّاسِپڑھو، ان کی تلاوت کرنا تمہیں  ہر بری چیز سے بچائے گا۔( سنن نسائی، کتاب الاستعاذۃ، ۱-باب، ص۸۶۲، الحدیث: ۵۴۳۸)

            اللّٰہ تعالیٰ سے دعا ہے کہ اس تفسیر کو عوام اور خواص سبھی مسلمانوں  کے لئے نفع بخش اور فائدہ مند بنائے اور اسے مسلمانوں  کی اعتقادی، علمی اور عملی اصلاح کا بہتر ین ذریعہ بنائے اور اس کے صدقے میری ،میرے والدین، میرے عزیز رشتہ داروں ،اساتذہ ِکرام،دوست اَحباب ،دیگر متعلقین اور معاونین کی بے حساب بخشش و مغفرت فرمائے۔ اٰمین ثم اٰمین۔